सभामुखद्वारा २०७९ मंसिर ४ को चुनाव नलड्ने घोषणा

वक्तव्य

नेपाली जनताको जीवनमा सकरात्मक परिवर्तन ल्याउने उद्देश्यसहित रुपान्तरणकारी राजनीतिमा सक्रिय भएको करिव साढे चार दशकमा लगातार तीनपटक निर्वाचित भई जनप्रतिनिधिमूलक संस्थामा क्रियाशील भएँ । २०६४ को पहिलो संविधानसभा र २०७० को दोस्रो संविधानसभामा सिन्धुपाल्चोक क्षेत्र नम्बर २ बाट निर्वाचित भई नेपालको संविधान निर्माणको ऐतिहासिक परिघटनाको हिस्सा बन्ने अवसर प्राप्त भयो । ती कार्यकालमा क्रमश: विसं २०६८ मा सूचना तथा संचार र विसं २०७२ मा वन तथा भूसंरक्षण मन्त्रीको जिम्मेवारी पनि निर्वाह गरें ।

२०७४ मंसिरमा सम्पन्न प्रतिनिधिसभा निर्वाचनमा सिन्धुपाल्चोक क्षेत्र नम्बर १ बाट निर्वाचित भएँ र यही कार्यकालमा २०७६ माघ १२ गते प्रतिनिधि सभाको सभामुखमा निर्विरोध निर्वाचित भएँ । जनप्रतिनिधिमूलक संस्था, संघीय संसदको नेतृत्वका हैसियतमा पौने तीन वर्षको अवधिमा मैले देश र जनताको पक्षमा सदैव आफूलाई समर्पित गरें ।

यी सबै कार्यकालमा विधायिकी जिम्मेवारीका अतिरिक्त सिन्धुपाल्चोकबासीको विकासको चाहनलाई मूर्तरुप दिन आफ्नो ज्ञान, क्षमता र विवेकले भ्याएसम्म मेहनत गरें । मेरो प्रयासको कदरस्वरुप सिन्धुपाल्चोकका जनताले पटक पटक मलाई निर्वाचित गर्नु पनि भयो ।

मलाई लगातार तीनपटक निर्वाचित गरी राष्ट्रिय भूमिका निर्वाह गर्ने र जनताको सेवा गर्ने अवसर दिनुभएकोमा सिन्धुपाल्चोकका आदरणीय मतदाता एवं जनसममुदायमा हार्दिक आभार व्यक्त गर्दछु ।

संघर्षशील पृष्ठभूमि, राजनीतिक पहलकदमीको संभाव्यता तथा जिम्मेवारीप्रतिको इमान्दरिताका कारण पार्टी, सिन्धुपाल्चोक र खासगरी क्षेत्र नम्बर १ का मतदाता तथा शुभचिन्तकहरुले पुन: जनप्रतिनिधिको भूमिका निर्वाह गरोस् भन्ने शुभेच्छा राख्नुभएकोमा धन्यवाद दिंदै आगामी २०७९ मंसिर ४ को प्रतिनिधिसभा निर्वाचनमा उम्मेदवार नबन्ने निर्णय गरेको निवेदन गर्न चाहन्छु ।

संसदीय भूमिकामा नरहे पनि म देश, जनता र अग्रगमनको पक्षमा निरन्तर क्रियाशील भइरहने छु र अग्रगामी राजनीतिक अभियानमार्फत् आम नेपाली नागरिकको समुन्नतिका लागि आफ्नो बुद्धि र विवेकले भ्याएसम्म काम गर्नेछु । त्यस्तै, राज्य र जनताले आवश्यक ठानेमा जुनसुकै जिम्मेवारी बहन गर्न तयार छु । राजनीतिक एव् सामाजिक मञ्चमार्फत् सबै नेपालीको स्वाभिमान र आत्मविश्वास उँचो बनाउन मेरो सक्रियतामा कुनै कमी आउन दिने छैन । मानव जातिको उन्नतिका लागि परिश्रम गर्नु मेरो जीवनको आदर्श हो ।

किशोर उमेरमा न्यायपूर्ण आन्दोलनमा सहभागी भएको तथा युवालाई रुपान्तरणकारी आन्दोलनमा क्रियाशील हुन तथा जिम्मेवारी लिन निरन्तर प्रेरित गर्दै आएकाले राज्य संचालनको जिम्मेवारीमा युवाको उल्लेख्य हिस्सा हुनुपर्छ र त्यसका लागि कसै न कसैले पहल र त्याग गर्नुपर्छ भन्ने मान्यतामा मेरो दृढ विश्वास रहँदै आएको छ । मलाई आशा छ, मेरो यो निर्णयले राजनीतिक रुपान्तरणका लागि नयाँ रक्तसंचार गर्नेछ ।

२०७९ असोज २२

अग्निप्रसाद सापकोटा